គ្រូបង្រៀន និងគណៈគ្រប់គ្រងសាលារៀនជាង ៦០០នាក់ បញ្ចប់ការសិក្សាថ្នាក់បរិញ្ញាបត្រជាន់ខ្ពស់ ដើម្បីលើកកម្ពស់គុណភាពអប់រំ

គណៈគ្រប់គ្រងសាលារៀន និងគ្រូបង្រៀនសរុបជាង ៦០០នាក់ បានបញ្ចប់ការសិក្សាថ្នាក់បរិញ្ញាបត្រជាន់ខ្ពស់ជាផ្លូវការ ។ ការបញ្ចប់ការសិក្សានេះ ស្ថិតក្រោមកម្មវិធីលើកកម្ពស់គុណវុឌ្ឍិគណៈគ្រប់គ្រង និងគ្រូបង្រៀន ដែលត្រូវបានរៀបចំ និងអនុវត្តដោយសាកលវិទ្យាល័យភូមិន្ទភ្នំពេញ ។ កម្មវិធីនេះត្រូវបានបង្កើតឡើងក្នុងគោលបំណងពង្រឹងសមត្ថភាពវិជ្ជាជីវៈ និងបង្កើនគុណវុឌ្ឍិផ្នែកអប់រំសម្រាប់បុគ្គលិកអប់រំនៅតាមសាលារៀន ។ តាមរយៈការសិក្សាថ្នាក់បរិញ្ញាបត្រជាន់ខ្ពស់នេះ គ្រូបង្រៀន និងអ្នកគ្រប់គ្រងសាលាមានលទ្ធភាពទទួលបានចំណេះដឹងស៊ីជម្រៅ និងបច្ចេកទេសថ្មីៗ ដើម្បីយកមកអនុវត្តក្នុងការបង្រៀន និងការគ្រប់គ្រងសាលារៀនឱ្យកាន់តែមានប្រសិទ្ធភាព ។ ការជំរុញឱ្យគ្រូបង្រៀន និងគណៈគ្រប់គ្រងទទួលបានសញ្ញាបត្រកម្រិតខ្ពស់ គឺជាផ្នែកមួយនៃកិច្ចខិតខំប្រឹងប្រែងរបស់ក្រសួងអប់រំ យុវជន និងកីឡា ក្នុងការលើកកម្ពស់គុណភាពអប់រំជាតិ ។ ការពង្រឹងគុណភាពធនធានមនុស្សក្នុងវិស័យអប់រំនេះ នឹងជួយឱ្យការបង្រៀន និងការរៀនសូត្រមានភាពរីកចម្រើន ស្របតាមស្តង់ដារអប់រំទំនើប ។